Propostas da CIG para o Convenio de Consultoría

O pasado mes de maio a CIG levou as súas propostas á Mesa de Negociación do Convenio Colectivo de Consultorías. Na reunión, que tivo lugar en Madrid, a Confederación Intersindical Galega levou as propostas que se detallan máis abaixo e que foi froito da consulta a afiliados e delegados do sector.

A día de hoxe o convenio encóntrase prorrogado até o 31 de Decembro deste ano sen grandes avances por parte da patronal que reclama a conxelación e absorción da antigüidade, unha subida para os anos 2010,2011 e 2012 dun 3% en total e a unificación das categoría profesionais para facilitar a mobilidade dos traballadores.

________________________________

Desde a Confederación Intersindical Galega non podemos negar a existencia dunha situación de crise profunda que leva a unha menor contratación de servizos e dificulta e retrasa o cobro de facturas emitidas complicando gravemente a liquidez dalgunhas empresas do sector  e, incluso, dificultando a viabilidade dalgunhas delas.

Sen embargo non se pode aplicar de forma xeralizada esta visión ás empresas do sector onde podemos atopar empresas con beneficios netos 140% superiores no 2012 en comparación cos do 2011 ou empresas en plena expansión por varias comunidades do Estado.

 

Supresión do Complemento de antigüidade

O complemento de antigüidade non é unha mera retribución en función do tempo transcorrido nunha empresa. Este complemento remunera o traballo que realiza un traballador cunha experiencia recoñecida na empresa e a súa capacidade de solventar con maior axilidade os problemas que se lle plantexa. É unha retribución á produtividade e non un mero mecanismo automatizado de incremento do salario

O feito de que existan sentenzas que consideran que o complemento de antigüidade non é absorvible non é un argumento relevante para a súa supresión pois non aporta outra forma de compensación da experiencia adquirida e, polo tanto, da maior produtividade do traballadores que adquiren ese dereito. Incluso se pode dicir que as propias sentenzas fundamentarían o mantemento dese complemento sendo este irrenunciable.

Táboas salariais

E unha realidade que os salarios previstos no convenio están conxelados desde o ano 2009. Dous anos de conxelación salarial supuxeron xa un esforzo relevante para os traballadores e traballadoras permitindo unha capitalización importante para empresas obrigadas polo presente convenio e unha maior competividade das mesmas.

A utilización que as empresas realizaron das cantidades non abonadas pola non actualización dos salarios do convenio é responsabilidades destas, non podendo seguir esixindo máis esforzos aos traballadores.

Nese sentido a subida salarial do IPC incrementada en 1% é unha proposta realistas que non cubriría, sequera, o esforzo realizado xa polos traballadores nos últimos 2 anos.

Plus de Turnicidade

A aplicación de horarios nas empresas, e en destino, establecidos en función dos contratos realizados cos clientes levan incluso a réximes de quendas de mañá, tarde e noite (24X7) sen que existan compensacións ao quebranto que isto supón na conciliación da vida laboral e familiar. Faise necesario polo tanto o establecemento dun plus de turnicidade  para o persoal afectado polos traballos en quendas equivalente a 140€ mensuais por 14 pagas.

Plus de Nocturnidade

No mesmo sentido, xeralízase tamén a realización de traballo nocturno sen que se realice compensación algunha polos inconvenientes para a saúde e para unha correcta conciliación da vida laboral e familiar. Neste sentido propoñemos un incremento salarial do 25% para as horas realizadas entre as 22:00 e ás 6:00. No caso de que se realizaran catro ou máis hora nesa franxa horaria o incremento se aplicará a toda xornada.

Complemento de dispoñibilidade

Tampouco está previsto ningún tipo de compensación pola dispoñibilidade que se ven esixindo aos traballadores que deben a acudir fora do seu horario laboral para solventar incidencia ou manter en funcionamento os servizos esixidos polos clientes nos contratos asinados pola empresa. Neste sentido faise imprescindible unha compensación económica equivalente a 50€ mensuais por 14 pagas.

Contratos de prácticas.

É habitual por parte das empresas do sector a utilización dos contratos de prácticas para a contratación de novos traballadores. Este contrato, que ten unha redución salarial sobre as táboas salariais que supera con crece a proposta da patronal de introducir  un nivel profesional cunha retribución sexa inferior nun 20% ao nivel máis baixo e polo tanto xa suple con creces esa pretensión da patronal, non se transforma en indefinido en moitas das contratacións realizadas sen que exista ningunha xustificación para que iso aconteza. Isto leva a perda de persoal con experiencia e que estivo percibindo unha retribución moi inferior ás establecidas no convenio. Por ese motivo entendemos que os contratos de prácticas realizados teñen que ter como obxectivo final a súa transformación en indefinido salvo causa xustificada que deberá ser manifestada e argumentada pola empresa.

Formación

En aplicación da normativa vixente, a empresa terá a obriga de facilitar 20 hora anuais de formación que se acumularán automaticamente de non seren consumidas. O non consumo das horas de formación será de mutuo acordo entre a empresa e o traballador.

A empresa deberá facilitar tamén a formación online até un máximo de 20 horas anuais independentemente de que esta sexa esixida pola empresa ou solicitada polo traballador.

Denuncia, revisión e prórroga

Denunciado o presente Convenio Colectivo e mentres non sexa substituído por outro novo Convenio, manterán a súa ultractividade prorrogándose tacitamente de ano en ano, namentres non se chegue a un acordo entre as partes.

No caso de prorrogarse, efectuarase un incremento salarial equivalente ao incremento porcentual do IPC no seu conxunto nos 12 meses anteriores máis 1 punto.

Prestacións por enfermidade e accidente de traballo.

Tendo en conta a actual normativa laboral sobre absentismo e as súas posible consecuencias en caso de IT, xunto coas actuais estatística que afirman existir unha redución das horas de IT collidas polos traballadores; as empresas afectadas por este Convenio, e tendo en conta , desde o primeiro día da correspondente baixa, complementarán as prestacións dos seguros de enfermidade e accidentes de traballo, ata o 100 por 100 do salario durante un prazo máximo de doce meses, a partir da baixa. Incluído o 100% das pagas extras.

Teletraballo

Os asinantes deste Convenio avanzarán en fórmulas de aplicación do teletraballo como forma dunha mellor organización do traballo na empresa e encamiñada a conciliación da vida familiar e laboral, con especial atención aos traballadores con discapacidades, embarazadas ou traballadores con persoas a cargo.

Permisos retribuídos.

Os traballadores, previo aviso e xustificación, poderán ausentarse do traballo, con dereito a remuneración, por algún dos motivos e polo tempo seguinte:

1. Quince días naturais en caso de matrimonio ou inscrición como parella de feito.
2. Conforme ao teor literal do vixente artigo 37.3.b do Estatuto dos Traballadores, «Dous días polo nacemento de fillo e polo falecemento, accidente ou enfermidade graves, hospitalización ou intervención cirúrxica sen hospitalización que precise repouso domiciliario, de parentes ata o segundo grao de consanguinidade ou afinidade. Cando con tal motivo o traballador necesite facer un desprazamento ao efecto, o prazo será de catro días. No caso de falecemento do cónxuxe, pais ou fillos o permiso será o establecido no seguinte inciso c). En todos os supostos non será obrigatorio o goce dos mencionados permisos retribuídos nas datas inmediatamente consecutivas ao feitos causante, podéndose xestionar os mesmos segundo as necesidades do traballador.
3. Catro días nos casos de falecemento de cónxuxe, pais ou fillos, incluíndose neste tempo os posibles desprazamentos.
4. Dous días por traslado de domicilio habitual, que serán tres no caso de traslado ou desprazamento do Centro de Traballo.
5. Polo tempo indispensable, para o cumprimento dun deber inescusable de carácter público e persoal. Neste supostos se inclúe a asistencia as consultas médicas do propio traballador e o acompañamento ás consultas médicas dos seus fillos ou dependentes a cargo até segundo grado de consagüinidade ou afinidade. Así como o acompañamento ás consultas medidas dos pais e parellas no caso de accidente ou enfermidades graves.
6. Para realizar funcións sindicais ou de representación do persoal nos termos establecidos na lei e no presente Convenio.
7. Conforme ao teor literal do vixente artigo 37.3.f do Estatuto dos Traballadores, «Polo tempo indispensable para a realización de exames prenatais e técnicas de preparación ao parto que deban realizarse dentro da xornada de traballo».

Xornada Laboral

Co obxectivo de conciliar a vida laboral e familiar, os traballadores e traballadoras que non estean desprazados a outra empresa ou obras por razón de servizo, ou aínda estando desprazado o contrato de prestación do servizo así o permita, gozarán dunha xornada flexible nas entradas e saídas en función das necesidades do traballador, espetándose un número de horas de presenza común que non superará as seis horas que se establecerá de mutuo acordo coa representación dos traballadores.

Read more ...